MWENYEKITI wa Chama Cha Mapinduzi (CCM), Rais John Magufuli amesisitiza kutekelezwa kwa mpango wa serikali kuhamishia makazo yake mkoani Dodoma ndani ya kipindi cha miaka mitano ya utawala wake huku akitangaza kuigeuza Ikulu ya Magogoni jijini Dar es Salaam kuwa sehemu ya maonyesho.
Aidha, Rais Magufuli amesema majengo ya wizara mbalimbali yaliyopo karibu na mwambao wa Bahari ya Hindi jijini Dar es Salaam yatauzwa kwa wawekezaji mbalimbali ili yageuzwe hoteli za kitalii na fedha zitakazopatikana zitatumika kuustawisha mji wa Dodoma ambako serikali inahamia.
Magufuli alitangaza mpango huo jana wakati akizungumza na viongozi na wanachama wa chama hicho muda mfupi baada ya kutembelea ofisi yake ya kichama iliyopo ndani ya jengo la Ofisi Ndogo ya Makao Makuu ya CCM, Lumumba jijini Dar es Salaam.
Rais Magufuli alisema wale wanaosema kuwa amesema atauza Ikulu baada ya kuhamia Dodoma wanapotosha ukweli kwa sababu serikali haina mpango huo.
“Wengine wanasema Ikulu itauzwa.. jengo la Ikulu litabaki pale, litakuwa jengo la maonyesho… wizara na majengo mengine yaliyo jirani na bahari yatauzwa ili tupate fedha za kuiendeleza Dodoma,” alisema Magufuli.
Tag :
lainnya
